Ol pipol bilong Aitape na Is Sepik Provins bai kisim planti helpim tru taim ol wokman i mekim pinis dispela bris long Wara Arech.

Wara Arech long ples Yakamul long Is Kos bilong Aitape, i wanpela hap we isave givim planti hevi tru long ol lain husat isave usim dispela haiwe rot igo long Wewak o Aitape, long kisim sevis.

Long taim bilong bikpela ren o taim wara isave tait, ol kar na manmeri tu isave painim hat taim tru long brukim wara igo long hapsait.

Wara Arech yet ikam aninit long dispela nambawan hap bilong nesinol progrem bilong Yumi Yet Bridges, we Nesinol Gavman i givim moni bilong mekim dispela ol wok.

Tupela enjinia, Murray Konzanz wantaim Philip Bao, bilong Mabey & Johnson kampani, (ol lain husat i kisim kontrak long mekim dispela bris), ibin tok olsem dispela bris long Arech bai i longpela olsem 90m olgeta, na bai ikisim tu inap olsem 3pela mun long pinisim.