Sampela liklik spot nius ikam long NASA Tonamen.
Soka sisen insait long Nuku Distrik ibin kamap gutpela tru wantaim ol kainkain ol gutpela pilai.
Mipela i statim ol geims long Sande nambawan dei bilong mun Jenuari 2005. Inap olsem 6pela tims olgeta ibin salens, nem bilong ol; Nomads, Waspeik, Crackers, Samkou, Absence na ol Finishers.
Bihain long seken raun bilong ol pilai, tim husat ibin holim nambawan ples em ol Waspeik. Samkou ibin stap seken, Nomads ted na ol narapela ibin kam bihain.
Long taim bilong ol nokauts long 20th Mas 2005, Waspeik ibin pilai wantaim ol Nomads. Long fes hap ol Nomads ibin soim stail bilong ol na skorim wanpela gol. Tasol ol Waspeik ino bin surik, ol tu i soim sampela stail bilong pilai na givim tupela gol gen long ol Nomads. Long dispela seken hap, ol Nomads sapota ibin bel hevi liklik na ol ibin tromoi sampela ol toktok nogut long ol tim bilong ol Waspeik. Dispela ibin kamapim liklik pait tasol bihain ol ibin stretim.
Ol soka sisen tu long dispela yia 2005 bilong NASA Tonamen bai stap tasol long Warsai.