Distrik Polis Steisen Komanda (PSC) igivim ripot long wanpela stil we ibin kamap long Aitape Provinsel Hai Skul.

Sajen Meija Paul Vavena ibin givim ripot olsem sampela ol skul mangi iibn go insait long het opis bilong ol tisa na bagarapim planti ol samting bilong ol. Ol i brukim tu liklik turangu boks na stilim inap olsem K10 we ibin stap insait.

PSC ibin stori tu olsem dispela stil ibin kamap isi tru long wanem ol ibin usim wanpela ki we wanpela long ol ibin lukim i hangamap long dua bilong het opis bihain long wanpela blekaut ibin kamap long skul.

Ripot itok moa olsem, long taim dispela blekaut ibin kamap, dispela tisa husat ibin stap long duti long dispela taim ibin hariap long go long haus na ibin lustingting long rausim ki taim em i lokim pinis dua. Dispela tu i givim evidens olsem ol dispela lain husat ibin go insait long opis ino bin brukim dua o windo long go insait.

Ol polis i kisim ripot pinis olsem em ol skul mangi yet ibin stap insait long dispela stil na ol i wok long mekim wok painimaut yet.

"Ol skul mangi imas lusim dispela kain ol bikhet pasin na stat long luk klia long wanem as na ol istap long skul. Disiplineri Bod ino inap long marimari long husat ol mangi iting olsem ol i moa yet long mekim dispela pasin na tu pulim ol narapela pikinini long mekim dispela ol kain raskol pasin," Sajen Meija ibin mekim dispela strongpela toktok.