Yangpela man na meri long Yiwanu Katolik Yut insait long Nuku Peris, igat 83 yut ol i bung long Pam Sande na kamapim Yukaris Mini Reli bilong ol.
Astingting: "Yumi mas redi long wokabaut wantaim Jisas long Bodi na Blut bilong en - Yukaris." Ol yangpela man na meri bilong Yiwanu Yut ol i amamas na onarim Jisas Krais, long wanem taim em indai long diwai kros em i kamap King na nambawan bilong olgeta samting.
Siaman bilong Yiwanu Yut, Jacob Kuam ibin givim ripot olsem long Fraide 18 dei bilong mun Mas 2005, 83pela yangpela man na meri ibin kam bung wantaim na openim dispela reli wantaim misa we Fr. Gianni Gatei OFM, ibin go pas long en.
Bihain long misa ibin gat Rot Kruse raun long misin eria bilong peris na Nuku taun tu. Bihain long rot Kruse, olgeta yut ibin bung long Haus Lotu na mekim adoreisen pre long tingim Jisas Krais insait long Yukaris.
Long sarere 19 Mas, olgeta yut ol ibin bung long Haus Lotu long misa. Bihain long misa ibin gat skul bilong Blut bilong Jisas Krais. Bihain long dispela skul, ol wanwan yut igo long konpesio wantaim pater.
Bihain long dispela ibin gat pre korona long nait bilong tingim Maria i meri bilong Sios.
Mr. Kuam ibin stori tu olsem long Sande 20 dei bilong mun Mas, ol yut ibin holim wanpela kombain misa wantaim olgeta katolik bilip manmeri bilong Nuku taun peris. Ol yut yet igo pas long liteji bilong Pam Sande Misa long Nuku Peris.
"Dispela bung bilong ol yut ibin ron gut tru long wanem, olgeta yangpela yet ibin mekim kontribusen long K5.00 long wanwan manmeri na tu ol ibin bringim wantaim ol kaikai we ol i bungim wantaim. Dispela kaikai ibin helpim long fidim ol long dispela 3pela dei we ol ibin stap long dispela mini yut reli long Nuku," Mr. Kuam ibin stori.
Em itok tu olsem ibin gat planti ol papa na mama tu husat ibin bung wantaim ol yut long dispela amamas bilong ol.
Mr. Kuam i mekim wanpela askim tu igo long sios lida, papa mama, na wokmanmeri bilong gavman, long ol inoken krosim o kotim ol yangpela manmeri taim ol i mekim rong. Ol imas painim sampela wei na kisim ol yut ikam bek long gutpela stretpela wei o rot, long wanem ol yangpela manmeri ol yet i sios na gavman bilong tumoro long ples na kantri.
Em ibin tok amamas na tenkyu tu long Pater Gianni Gatei ofm, Br.Ignas Wablu, na Katekis Tomas Aven wantaim tu ol papa mama long sapotim dispela reli we ibin kamap.
Bihain long misa na olgeta toktok ibin gat bikpela kaikai na bihain olgeta yut igo bek long ol wanwan peris bilong ol.