Ol yangpela meri insait long St. Ignatius Katedrol Peris i amamasim Fis dei bilong ol.

Dispela niupela asosiesen o grup we Fr. Chinedu Nwadike CSSp, Peris Pris bilong St. Ignatius Katedrol Peris ibin kamapim em bilong ol yangpela meri husat ino marit na ino gat pikinini yet.

Dispela grup nem bilong ol 'Catholic Girl's Associaton' (CGA). Igat tu ol narapela asosiesen olsem Catholic Boys (CBA), Katolik Papa (CPA) na Katolik Mama (CMA) istap.

Long dispela Fis Dei we ibin kamap long 28 dei bilong mun Mas, ol yangpela meri insait long dispela peris ibin kam bung wantaim long amamasim dispela dei bilong ol.

Long Tumeleo Ailan, ibin gat gutpela Misa stret, iibn kamap we Fr. Gianni Gatei ofm, ibin go pas long mekim. Sampela ol lain bilong Aitape taun tu ibin go wantaim pater long bung wantaim ol pipol bilong Tumeleo Peris long selebreitim dispela dei.

Ol skul pikinini aninit long lukaut bilong niupela het tisa na meri bilong em, Nelson na Barbara Tango ibin lainim ol skul pikinini na sampela ol memba bilong CGA long ol prosesio na dispela ibin mekim Misa i kamap gutpela moa.

Planti long ol lain husat ibin stap long dispela taim ibin tok olsem em i nambawan taim tru long dispela kain dei long kamap na Misa wantaim ol prosesio i naispela tru.

Fr. Gianni ibin tok tu olsem em ibin nambawan taim tru bilong em long go long Tumeleo Ailan na em ibin amamas tru.

Bihain long Misa, Mr. na Mrs. Tango ibin presenim pater tu wantaim wanpela basket igat wanpela klei pot istap insait wantaim ol sel bilong nambis.

Ibin gat liklik kaikai tu bilong pater na ol lain bilong em, na voli-bol pilai bilong ol CGA, CBA, CPA na CMA.

Sampela ol bikman na meri bilong ailan husat ibin stap long dispela taim ibin tok olsem dispela dei ibin kamap gut tru wantaim helpim bilong Mr. na Mrs. Tango, long wanem tupela i wok long mekim bikpela wok tru long Tumeleo long bungim ol yangpela wantaim bai ol i lusim ol kainkain bikhet pasin na tanim bel long senisim laip bilong ol.