Ol sampela liklik lain bilong ples Miwaute i soim pasin bilong lukautim ples graun bai dispela iken kamapim helti komuniti, helti famili na helti laip bilong yumi wanwan, long Aitape-Lumi Distrik.
Dispela liklik grup bilong ples Miwaute long Fatima Peris, Katolik Misin long Lumi ibin statim dispela ektiviti bilong klinim ples ol i kolim long 'Clean up the World Awareness Campaign' long 14 Ogus long las yia 2005.
Long nambawan ektiviti bilong ol, ol ibin klinim ples long Miwaute igo long Fatima. Dispela tu ibin nambawan taim dispela kain ektiviti kamap long sapotim dispela 'Clean up the World Campaign' long Sandaun Provins.
Bihain ibin gat kin-ap i kamap long Keipen Jangsen igo long Fatima na long Jangsen igo long Miwaute. Long 27 Mas ol ibin mekim klin-ap long Miwaute igo long Lumi Stesin.
Man husat igo pas long statim dispela kain wokabaut bilong lukautim ples graun em Fabian Manjox.
Mr. Manjox ibin stori olsem ol pipol bilong ples Wilbete na Miwaute ibin bung wantaim long givim han long mekim dispela kain wok.
Em itok moa olsem igat planti ol lain husat i givim helpim olsem ol volentia (volunteers) na namba bilong ol i wok long kamap bikpela moa yet. Igat ol papa, mama, yut na ol pikinini husat istap olsem ol volentia bilong dispela klin-ap awenes kempein. Membasip namba i olsem 60pela olgeta long nau yet tasol planti moa igat laik long kamap memba tu.
Mr. Manjox i tok olsem dispela klin-ap i save kamap long taim bilong olgeta kansol dei.
"Our theme is to make Aitape-Lumi a greener, healthier place to live in. I believe in myself, because after all I'm helping people to live more healthier lives and we should stop depending on foreigners to do it for us, we should do it ourselves," Mr. Manjox ibin tok.
Em itok moa tu olsem bikpela as tingting bilong dispela 'Clean up the World Campaign' em long kamapim sampela moa wok bilong ol pipol long mekim (employment, job opportunities), na moa yet long mekim komuniti i luksave olsem ol imas klinim na lukautim ples graun olgeta taim.
Mr. Manjox i tokim Aitape Star tu olsem bai igat moa awenes ektiviti bai kamap long kamapim planti moa volentia klin-ap grup. Ol ibin kam tu long Aitape long dispela mun long mekim sampela awenes pinis.
Dispela 'Clean up the World Campaign' em Quantas Airlines ibin sponsorim, Gavaman bilong Australia long Dipatmen bilong Foreign Affairs na Trade i sapotim na UNDEP i Praimeri Patna wantaim Nesinol Geografik channels husat i Global Media patna. Petron bilong dispela faundeisen em VEOLIA.
Mr. Manjox i toksave tu olsem bai gat wanpela bikpela klin-ap ektiviti bai kamap long Sumoro Trek long mun Julai dispela yia 2006. Planti man, meri bai mekim dispela klin-ap na Mr. Manjox i apil tu long husat i laik givim sampela helpim long sapotim dispela wok bilong ol, iken mekim doneisen bilong yu long Sumoro Tenkile Volunteers, akaun namba: 1001129777, Fatima Agent, Aitape Branch (BSP).
Long sait bilong helpim bai ol i nidim ol kain samting olsem moni, samting bilong wok (gloves, plastic bags bilong pulumapim rabis, etc), kaikai na dring, yu yet volentia (sapos yu gat laik long helpim) na gutpela tok, sapot na rispek.