Lumi Distrik insait long Sandaun Provins ino bin lukim sampela kain gutpela o bikpela senis long ol gavman sevises inap long planti yia nau.
Deputi Siaman bilong Wes Wapei Lokol Levol Gavman long Aitape-Lumi Distrik, Chris Saikou ibin mekim dispela toktok taim em i wok long autim tingting bilong em long hamas wok gavman i mekim long sait bilong sevises na infrastraksa insait long dispela eria.
Mr. Saikou ibin tok olsem bikpela bagarap tru em istap long ol rot.
"Ol imas stretim ol rot. Mipela i laik lukim bai kar i ron long dispela Kapam-Fatima Lumi rot. Nau long dispela taim inogat wanpela kar i ron long dispela rot yet, long wanem em i bagarap moa," em tok.
Mr. Saikou i tok moa olsem Memba bilong Aitape-Lumi, na Fores Minista Patrick Pruaitch ino bin usim moni gut long stretim dispela rot, taim em ibin givim K150, 000 igo long sampela ol lain husat ol i tok bai ol i stretim rot.
Em itok moa olsem dispela moni ino bin helpim planti manmeri, na Mr. Pruaitch ibin sapos long kisim ol masin stret long mekim dispela rot, we istap olsem bikpela hevi na bel-wari long ol pipol bilong dispela elektoret.
Mr. Saikou itok Mr. Pruaitch igat nainpela mun long painim ol masin long wok long dispela rot nogut, bipo long niupela eleksen ikamap.
Em itok, minista imas holim pasim dispela tok em ibin mekim long stretim ol rot long taim bilong lonsing bilong Treseri Opis long Lumi.
Mr. Saikou itok: "Em imas kamaut na tok klia long ol pipol long wanem na dispela sevis ino kamap yet. Ol pipol ino trastim em moa, na em ino wanpela tasol. Mipela bai lukluk long ol narapela gutpela ol kendidet. Sapos toktok bilong Mr. Pruaitch i karim kaikai bipo long dispela eleksen, orait 'good luck' long dispela niupela eleksen."
Long dispela taim tu, wanpela komyuniti skul het-tisa i askim Mr. Pruaitch long stopim dispela kain pasin long givim moni nating, nating long ol manmeri.
Simeon Ariman ibin tok ol lain Karaite i lukim dispela pasin i wok long kamap we bikpela ol moni i wok long go long ol kainkain manmeri na ol sapota bilong minista insait long distrik, taim igat ol hap we i nidim tru dispela ol moni long stretim ol gavman sevises na ol arapela samting.