Ol lain bilong Sumoro Tenkile Volunteers grup i mekim bikpela wok klin-ap long Sumoro Trek.
Fabian Manjox, man husat i go pas long dispela wok ibin givim stori long Aitape Star, long em wantaim ol lain bilong em ibin mekim bikpela wok long Sumoro Trek, Wara Walmui na hap bilong Wibete ples.
Mr. Manjox ibin stori olsem ol ibin pulumaim inap long tupela bikpela bek olgeta long ol pipia plastik na ol tin.
Long dispela taim tu grup ibin klinim wanpela ples we ol manmeri husat isave usim dispela rot iken tromoi ol pipia bilong ol, na noken bagarapim bus graun wantaim ol enimel.
Ibin gat 37pela manmeri husat ibin putim han long mekim dispela wok klin-ap.
Mr. Manjox itok olsem as tingting bilong dispela wok em long mekimples ikamap nais o gutpela moa, helpim bus graun (planim ol diwai na flawa), mekim komyuniti komposing na ol kainkain helt awenes progrem tu.
"Bai mipela i klinim tu ol pablik rot na ples wantaim," Mr. Manjox i stori.
Tasol Mr. Manjox itok tu olsem em i nidim yet sapot bilong ol arapela lain long karim-aut dispela bikpela wok. Em itok long sapot bilong ol kain lain olsem ol NGO, ol sios na ol bisnis kampani insait long Aitape-Lumi na ol arapela hap autsait tu.
Em igivim ripot tu olsem bai gat wanpela environmentel awenes bai kamap long sampela taim bihain long Aitape, na em i askim helpim tu long sait bilong megafon na ol narapela samting bilong mekim awenes.
Long mun Ogus igo long Disemba 2006, bai em wantaim ol lain tim bilng em bai mekim dispela ol enviromentel edukeisen awenes long ol wanwan pablik ples na ol skul.
Long dispela taim tu Mr. Manjox ibin mekim sampela toktok long kliaim tingting bilong sampela ol lain husat i ting olsem dispela wok bilong Sumoro Tenkile Volunteers (STV) grup em i wankain olsem Tenkile Conservation Alliance (TCA).
Em itok olsem, dispela tupela grup em ol i narapela olgeta. TCA isave sapotim tasol wok we STV i save mekim long klin-ap na konsevim o lukautim bus graun, na ol ino save sponsarim o givim helpim long sait bilong moni.
Mr. Manjox itok tu olsem em bai traim long stretim wanpela grup we istap long ples nambis tu bai ol iken helpim long mekim ol wok klin-ap na awenes long ol pipol imas lukautim tu ol rip na solwara bilong yumi.