Planti taim long sait bilong sios na sampela taim long gavman tu, sapos yu wanpela man o meri igat liklik namba tasol na yu laik tok aut long asua bilong ol lida, bai ol i rausim yu stret long wok o namba bilong yu.
Sapos yumi lukluk long olpela kontrak long baibel, taim God i lukim olsem ol king na pipol bilong em i mekim samting na bagarapim sindaun bilong ol arapela, em isave makim maus man o propet long tokaut long ol rong bilong ol lida na ol pipol long traim long stretim sindaun bilong ol pipol bilong God. sapos ol ino harim tok em save salim ol birua long mekim save long ol pipol bilong em yet.
Yumi wanwan katolik yumi ol mausman/meri o propet bilong God. Sapos yumi lukim ol samting ino stret long ai bilong yumi, yumi mas toktok planti long ol lida bilong sios bilong yumi wanwan long kamapim gutpela sindaun long ples na sosaieti bilong yumi.
Na bikpela samting olsem ol lida tu imas harim mipela ol liklik manmeri na traim senisim pasin bilong ol na tu long stretim ol hevi i wok long bagarapim sindaun bilong ol pipol.
Bikpela samting olsem, sapos ol lida i luksave long mipela wanwan olsem ol haphap bodi bilong God. Orait ol imas luksave olsem mipela iken helpim ol lida long stretim gut sindaun bilong ol pipol. Yumi tu igat save na pawa.