Wanpela woksop bilong HIV/AIDS Awenes we ibin kamap long Aitape ikisim planti gutpela sapot.

Dispela woksop we ibin kisim inap olsem tupela wik olgeta, ibin lukluk long ol kainkain samting olsem, wanem samting em dispela sik HIV na AIDS, stori bilong hau dispela sik ibin kamap, long ol kainkain wei wed ol manmeri iken kisim dispela sik na planti ol narapela toktok moa.

Man husat ibin go pas long kodineitim dispela woksop em Br. Kermit Fernander CSSp, husat i wanpela Bruder bilong Holi Spirit Oda (Spiritan) na tu husat igat pepa bilong wok olsem wanpela nes.

Br. Kermit em bilong ples Bahamas long Amerika, na taim em ibin stap long ol kainkain hap bilong wol, em ibin mekim planti wok tru long helpim ol lain husat igat dispela sik.

"While working as a nurse in various hospitals, I was able to gain alot of experience working with people who had contracted the disease, doing counseling and assisting with other HIV/AIDS awareness programs and so on," Br. Kermit ibin stori long tok inglis.

Dispela nambawan woksop ibin lukluk long wanem samting tru em HIV/AIDS. Tasol ibin gat tu narapela hap bilong woksop we ibin kisim tu tupela wik moa, na dispela ibin lukluk long skulim ol pipol long ol kainkain wei we ol iken kaunselim na tu givim helpim long ol lain husat istap wantaim dispela sik, na tu long lainim ol long givim skul bilong awenes long dispela sik.

Ino ol lain bilong helt tasol olsem ol nes ibin go long dispela woksop. Ibin gat tu ol tisa, ol mama, sampela ol wokmanmeri, ol lain relijis na tu ol yangpela manmeri ibin go long dispela woksop.

Dispela woksop em ibin nogat fi bilong em na ol lain husat ibin go ibin lainim planti samting tru we ol ino bin lainim bipo. Olsem na Br. Kermit i toktok strong olsem, sapos igat narapela ol woksop wankain olsem dispela we ino fi bilong ol, i gutpela long go na bai yu kisim planti "fri-save".

Ol lain husat ibin stap long dispela woksop. (Br. Kermit em man husat i brukim wanpela skru, na werim waitpela siot)