Yili sub-peris ibin selebreitim las promis bilong wanpela MCS (Missionaries of the Sacred Cuore "Heart") Bruder.
Br. Jude Moiak em bilong ples Piom insait long Yili sub-peris yet long Aitape Daiosis.
Dispela las promis bilong Br. Jude ibin kamap long ples bilong em yet long 2 Febueri 2005, na tu ibin nambawan taim tru long Yili sub-peris long holim wanpela kain selebreisen olsem.
Provinsel bilong ol MSC, Pater Edward Meli ibin stap long dispela taim long harim las promis bilong em na tu long mekim misa, wantiam tripela arapela pater bilong Ningil peris em Pater Augustine Aigilo, Pater Dominic Numbanoko na Pater Gianni Gatei OFM.
Misa ibin stat long 10 kilok na pinis klostu long belo. Dispela misa tu ibin ron gut tru long wanem wok bilong ol liteji na arapela samting ibin redi gut.
Mipela ol yut yet ibin go pas long liteji progrem long sait bilong musik na ol prosesio. Mipela ibin kisim tu gutpela helpim ikam long ol Presenteisen Sistes husat istap long Ningil peris.
Bihain long dispela bikpela misa bilong profesen, Pater Edward ibin givim bikpela tok tenkyu igo long ol komyuniti na ol yuts insait long Yili sub-peris bilong mekim dispela dei ikamap gut wantaim gutpela amamas.
Na em ibin givim tok tenkyu tu igo long ol lain femili, wanblut na kandre bilong Br. Jude long ol ibin givim em igo long dispela sosaieti bilong ol MSC oda, long stap singel na mekim wok misin bilong Jisas Krais.
Bihain long olgeta toktok, ibin gat bikpela bung kaikai na bihain ol manmeri ibin go bek long ol ples bilong ol.