Daiosis bilong Aitape igo pas long mekim wok awenes insait long Aitape, Lumi na Nuku long rere long 2007 Nesinol Eleksen.

Wok awenes bilong dispela niupela sistem bilong 'vote' ol i kolim long LPV (Limited Preferencial Voting) i wok long kamap nau insait long tripela dineri.

Dispela wok em ol opisa bilong Pis na Jastis Opis bilong daiosis i wok long mekim.

Nambawan woksop we ibin kamap long dispela awenes em long mun Septemba long las yia 2006.

Ol yut lida bilong Aitape Dineri tasol, inap olsem 16pela olgeta ibin stap insait long dispela woksop.

Meri husat ibin go pas long dispela woksop em Mavis Tito, husat i makim Caritas PNG. Em ibin kisim helpim tu ikam long Daiosis Pis na Jastis Opisa Tony Elmale.

Wantaim helpim bilong dispela ol yut lida, dispela wok bilong eleksen awenes i kamap pinis insait long planti ples long Aitape Dineri.

Namba tu woksop bilong eleksen awenes ibin kamap tu long Nuku Dineri we Mr. Elmale yet ibin go pas long givim. Dispela woksop ibin stap inap long fopela dei tasol.

"Mi bin amamas moa yet, long wanem dispela ol yut ibin soim olsem ol igat pasin bilong 'self-reliance' o pasin bilong helpim ol yet na ino askim ol narapela long helpim olgeta taim," Mr. Elmale ibin stori.

Caritas Kodineita bilong Daiosis, Rori Rawah ibin tok tu olsem bai igat namba tri woksop bilong eleksen awenes we bai kamap long Lumi Dineri, tasol wantaim hevi bilong trenspot long go long Lumi, em itok i luk olsem bai ol lain long Lumi imas wokabaut ikam long Aitape long stap insait long dispela woksop.

"Em i bikpela samting tru long ol pipol imas kisim gut save long dispela niupela sistem bilong vote, bai dispela i helpim eleksen bilong dispela yia ikamap gut," Mr. Rawah ibin tok.

Caritas PNG yet ibin go pas long givim moni long helpim dispela woksop ikamap, na wok bilong Daiosis Caritas Kodineita insait long Daiosis.