By Katekis Cathy Masueng
St. Antoni Peris (Ali/Seleo ailan)
Santu Antoni Peris, Ali Ailan wantaim Santu Francis Sab-peris, Seleo Ailan ibin holim wanpela kruseid long Ali ailan.
Bipo long kruseid, ibin gat sampela ol krangi tingting ibin stap long komuniti, long kruseid em i wanem samting?
Olsem na ol lain bilong sios ibin holim wanpela bung, na ol i toktok long stretim tingting bilong ol pipol, ol sios lida, wantaim helpim bilong ol wanwan gutpela save man long komuniti.
Ol ibin wok hat tru long stretim tingting bilong komuniti, long wanem em i nambawan taim tru ol ibin holim wanpela kruseid long Ali ailan.
Ibin gat bikpela wok redi we ibin kamap bipo long kruseid, olsem moning divosen na wok bilong penans tu we ibin stat long nambatu dei bilong mun Jenuari igo inap long nambatu dei bilong mun Februari.
Long 5 kilok apinun long nambatu dei bilong Februari, progrem bilong kruseid ibin stat wantaim gutpela sapot long ol toktok ikam long katekis, PST, KST, LLG memba na ol mausman bilong wanwan ples insait long Ali na Seleo ailan.
Long namba tri dei bilong Februari, progrem ibin stat long 10 kilok moning wantaim ol kainkain samting olsem Baibel Drama, ol eksen danis, kwaiya singsing bilong lotu, igo inap 3 kilok long apinun.
Bihain long 5 kilok progrem bilong kruseid stret ibin stat wantaim pre, singsing na serim tok bilong God.
Long namba fo dei bilong Februari, ibin gat bung Misa bilong ol lain bilong tupela ailan, Ali na Seleo we bikpela amamas ibin kamap wantaim ol prosesio, bigin, baibel, ofa na pinis. Fr. zachary Miroi ofm, ibin go pas long mekim dispela Misa.
Bihain ibin gat bikpela bung kaikai long pinisim olgeta wok bilong kruseid long 4 kilok apinun.
Olgeta Katolik manmeri bilong Ali na Seleo ibin gat bikpela amamas tru, long wanem ol ibin pilim tru strong bilong God Triwan i pulumapim ol.
Long lukluk bilong mipela, mipela i lukim tu olsem dispela kain ol bung em i wanpela wei bilong autim Gutnius bilong Jisas. Wok bung wantaim (komunio), serim wok wantaim long pre na autim tok bilong God i bringim lait long komuniti na i bungim yumi wantaim long spirit bilong yumi yet i sios.