Nambawan Katolik Meri Asosiseisen Woksop bilong Aitape Dineri ibin kamap long St. Martins' Pastorel Senta long namba 16 dei igo pinis long 20 dei bilong mun Februari 2009.
37pela lain ibin stap long dispela woksop, 5pela man na 32pela meri aut long 60pela lain olgeta. Ol ibin sindaun long wan wik skul bilong kisim save long rot bilong bihainim Rinuel bilong Daiosis.
Dispela em inambawan taim tu we ol man ibin stap insait long dispela kain progrem bilong ol meri. Na dispela em ibin gutpela moa long wanem ol meri inidim tru helpim bilong ol man long sapotim pasin bilong wok bung, serim wok lida, save na ol arapela samting long rot bilong laip long stap olsem man na meri.
Ol lain bilong woksop ikisim save long ol samting olsem, Katolik Meri Asosiseisen Straksa, Jenda Balens - Jastis, Bahasa Indonesia na Beisik HIV/AIDS.
Ibin gat 4pela lain husat ibin givim dispela ol skul, J. Waflo, A. Tauwei, B. Taingol na F. Oneke.
Ol dispela 5pela man husat ibin stap tu long woksop ibin givim ol gutpela tingting long helpim ol meri insait long olgeta skul na miting.
Fr. Eduardo Armenta ofm, ibin openim na pasim woksop wantaim Misa.
Long skul bilong Gut Nius, em imekim ol gutpela toktok long strongim mipela olgeta long wok wantaim pasin Jastis na stap olsem gutpela SOL na LAIT wantaim strong bilong HOLI SPIRIT bai gutpela wok iken kamap insait long wanwan Asosieisen bilong mipela ol Katolik meri na long famili, komuniti, peris na daiosis olgeta.
Bihain long dispela woksop, olgeta lain bai igo bung long wanwan peris bilong ol long mekim plen na progremim ol ektivitis bilong ronim insait long level asosiesen bilong ol yet. (Wanwan peris pris iken helpim ol long wokim dispela).
Long Fonde 19 dei bilong mun Februari long nait, Aitape Dineri Miting ibin nomineitim fopela nominis long go insait long Resis bilong Daiosis Presidensip we bai kamap long 15 dei bilong mun Ogus, Asumsio Tenkyu Dei long dispela yia.
Ol dispela fopela nominis em; Agnes Ndrasimah, Mary Pokom, Alfreda Tabokom na Philipa Kanako.
Opis bilong Women's Progrem long Daiosis igivim tu bikpela tok tenkyu igo long ol dispela 5pela man husat ol ibin stap insait long dispela wanwik woksop wantaim ol meri long pasin bilong daunim yupela yet na stap gut wantaim mipela ol meri.
Opis ilaik tok tenkyu tu long olgeta lain husat isoim pasin bilong 'self-reliance' long sait bilong; trenspot bilong kam na go, kaikai kam long Malol na St. Joachim Peris na paiawut kam long St. Ignatius Katedrel Peris.
Tenkyu tru olgeta na mipela ibekim singaut bilong God ikam, KIRAP NA YUMI GO!