A happy, blessed and richful year 2009 to you all and a happy new year.
Dispela em iripot bilong Krismas Pilgrim wokabaut we ol Katolik Yut na Meri ibin mekim igo long bungim ol Yut na Meri Grup bilong Yilui Peris.
Yilui Peris em istap long ilektoret bilong Telefomin. Na em iperis bilong Lumi Dineri insait long Aitape Daiosis.
Ol yut na ol meri bilong Fatima ibin wokabaut tripela dei na tupela nait bipo ol ikamap long Yilui.
Dispela wokabaut em iwanpela kain wokabaut bilong bilip we ol yut na meri grup ibin mekim tru sekrifais long dispela taim.
'Theme' o astingting bilong dispela wokabaut bilong bilip iolsem: 'Ol yut na meri grup bilong Fatima ilukim sta bilong Jisas na igo long painim em na lotuim em'.
Insait long dispela wokabaut igat 78pela ol manmeri bilong Katolik Yut na Meri grup husat ibin mekim dispela wokabaut. Ibin gat tu 10pela ol manmeri bilong Revival Sios bilong PNGRC husat ibin stap insait long dispela wokabaut.
Dispela 10pela tu ibin tokaut olsem em itaim nau we yumi olgeta kain sios imas holim han na wok bung wantaim bilong helpim ol arapela long bilip. Na tru ol ibin wanbel long stap insait long olgeta kain ektiviti we ibin kamap long Yilui Peris.
Ol pilgim bilong Fatima istatim wokabaut long 17 dei bilong mun Disemba na kamap long Yilui long 19 dei bilong mun Disemba. Long 20 dei bilong Disemba ol ibin malolo na long 21 dei Pater Joseph Tungi ibin mekim Misa bilong statim ol progrem bilong ol.
Dispela progrem ibin stat long namba 21 dei na pinis long 25 dei bilong Disemba, Krismas Dei.
Insait long dispela progrem ibin gat ol kainkain ektiviti olsem drama, choir, eksen singsing, baibel kwiz na basket senis.
Narapela hap amamas bilong dispela progrem em long taim ol Fatima ibin bung wantaim ol Yilui long selebreitim Misa bilong Krismas Nait an Krismas Moning. Dispela tu em ibin wanpeal niupela ekspiriens bilong ol lain bilong Fatima long Misa long nait wantaim nogat lait. Ol ibin putim tasol wanpela kas lam long alta na ol iusim ol tos bilong mekim ol prosesio.
Long planti yia tu ol lain long Yilui ino bin save gat Pater igo mekim Misa long ol kain bikpela pestodei bilong sios. Tasol nau long Krismas bilong 2008, ol iamamas tru taim Fr. Joseph Tungi ibin go mekim Misa long ol, na tu ol iamamas taim ol arapela peris olsem Fatima igo bung wantaim ol.
Yilui Peris igat olsem 1, 800 Katolik manmeri. Na em tu iwanpela peris insait long daiosis we olgeta manmeri ilotu long Katolik Sios tasol.
Raphael, Katekis bilong Yilui Peris igivim tu tok tenkyu bilong Peris igo long Peris Pris Fr. Joseph Tungi, Paula Yaisi, Collen Olikei na Alan Weitau long ol igo pas long kamapim dispela progrem bilong kisim ol Yut na Meri Grup bilong Fatima igo daun long Yilui.
St. John vianney Peris Yilui igat tripela Yut Grup na Meri Grup, St. Mary's, St. Paul na St. Joachim.
Askim tu igo long tupela kodineita bilong Yut Sr. Francesca Nama na Kodineita bilong ol Meri, Francesca Oneke bai yu tupela imas mekim fil visit long Yilui na helpim long luksave long ol eria we ol yut na meri inidim tru helpim.
Em itaim nau we yupela ol kodineita bilong ol wanwan sekta insait long daiosis imas wokhat na lukluk igo insait long ol perises olsem Yilui, Mukili, Warsai na Oum-Kupkain.
Givim 'priority' o luksave bilong yupela long ol, em niupela yia, yumi senisim sampela pasin bilong autim Gut Nius igo long ol bilong strongim Katolik bilip bilong ol.