Ol lain bilong Wok Sambai long St. Matin Pastorel Senta ibin holim wanpela Beisik Komyunikeisen Woksop bilong ol lain husat bai i mekim wok olsem ol kaunsela long ples.

Inap olsem 23pela man na meri ibin stap insait long dispela woksop. Ol dispela ol lain ibin kam long ol ples olsem Malol, Sissano, Barapu, Arop na Wati.

Poto bilong ol lain husat istap long woksop wantaim kodineita na ol tripela kaunsela bilong Wok Sambai.

Long ol dispela 23pela lain, ibin gat 16pela meri na 7pela man. Tupela man tasol ibin kam long ples Wati long Nuku, na ol narapela ibin kam long ol ples long nambis.

Ol lain husat ibin go pas long givim dispela woksop em, Job Tomur husat i Kodineita, na tripela narapela kaunsela Alexia Tomur, Andrew Bun na Sr. Mary Paropet MFIC, husat istap wok nau wantaim Wok Sambai bihain long wanpela wokman bilong ol ibin lusim ol.

Mr. Tomur ibin stori tu long Aitape Star olsem, dispela beisik komyunikeisen woksop i pat bilong dispela bikpela kaunseling woksop we bai i kisim 6pela wik olgeta. Dispela woksop bai kamap bihain long ol dispela lain igo long liklik malolo bilong ol.