Planti ol lain long Aitape husat ibin harim stori na lukim ol piksa bilong ol lain husat ibin kisim bikpela bagarap long tsunami long Saut Is Eisia, ibin pilim bikpela sori tru.

Planti ibin tingim bek dispela bikpela tsunami disasta we ibin kamap tu long ol pipol bilong mipela yet long yia 1998.

Olsem na long soim dispela wankain gutpela pasin bilong helpim wanpela na narapela, sampela ol gutpela ol sitisen bilong Aitape, i kamapim wanpela komiti bilong bungim ol moni na ol arapela doneisen, we bai ol i salim igo bilong helpim dispela ol lain i kisim bagarap.

Wanpela long ol gutpela man bilong komyuniti i givim liklik helpim bilong em.

Dispela komiti ol i kolim long 'Aitape-Asia Tsunami Relief Committee', opim tu wanpela akaun long BSP Aitape we yu husat man o meri yu laik givim sampela moni bilong helpim, iken mekim diposit.

Dispela akaun em: Aitape-Asia Tsunami Relief, akaun namba: 1001035273, brens: Aitape.

Sapos yu nogat moni tasol yu laik helpim long givim ol kain samting olsem ol olpela klos, sospen, betsit, na ol narapela samting, yu ken bringim o salim ol dispela doneisen bilong yu igo long ol dispela lain: Charles Sirongo long Misin Opis (Aitape), Anslem Raire long Distrik Opis (Aitape), Jacob Bigiglen long BSP (Aitape) na Sr. Lena Napmuku long Raihu Haus Sik.

Dispela komiti tu ibin mekim pinis tupela wil-baro pus wanpela em long Kumu Maket igo long Aitape Taun. Long dispela nambawan wil-baro pus, ol ibin kisim olsem K744.91. Long nambatu wil-baro pus, we ibin stat long Raihu Haus Sik igo long Aitape Taun, ol ibin kisim olsem K355.53 tasol. Dispela tupela wil-baro pus ikamapim mak moni olsem K1,100.44.

Planti ol moni doneisen tu i wok long kam long ol Sande koleksen we ol wanwan peris i wok long mekim.

Aitape-Asia Tsunami Relief Appeal Komiti i askim helpim bilong olgeta manmeri bilong Aitape, Lumi, Nuku na ol lain bilong Vanimo tu long bungim han na givim helpim igo long ol ikisim bagarap.