Sr. Linda, Sr. Elizabeth na Sr. Alice ibin mekim dispela ol promis long dei 15 bilong mun Jenuari 2007, long sapol bilong ol St. Clare Sistes, Aitape. Bisop Austin Crapp ofm, ibin go pas long mekim dispela misa wantaim helpim bilong sampela ol narapela pater.

Planti ol lain manmeri ibin kamap long witnesim dispela dei tu olsem ol famili na pren bilong ol tripela sistes, ol Sistes bilong MFIC yet na ol narapela lain bilong komuniti.

'Theme' o Astingting we ol tripela ibin makim long dispela bikpela dei em "Taim mi stap yet long bel bilong mama, God i makim me long mekim wok bilong em, na em yet i strongim mi."

Long skul bilong Bisop bihain long Gospel rit, em ibin toktok long plen bilong God long ol tripela meri husat i mekim promis long bihainim laip bilong ol misinari.

Em ibin tok tu olsem, sampela taim dispela kain wei bilong laip bai ino isi na bai ol tu i singaut long Jisas long tekewei dispela ol pen ol i pilim taim ol i wokabaut long wok bilong bringim tok bilong God long olgeta hap bilong graun.

"Dispela wok tripela i laik bihainim em laik bilong God na ol yet tu. Yumi pre tudei bai God i strongim ol long mekim wok bilong ol," Bisop Austin ibin tok.

Sr. Theresia Salatum MFIC, Provinsel bilong dispela oda bilong ol Sistes ibin harim na tok orait long promis bilong ol tripela niupela sistes.

Bihain long Misa, Sr. Theresia ibin tok bikpela tenkyu na amamas igo long Bisop wantaim ol pater long mekim misa, long ol liteji grup bilong naispela musik, singsing na prosesio long mekim dispela bung ikamap gutpela moa na bikpela tenkyu igo long Fomeisen Dairekta Sr. Rosemary Milur mfic, long bikpela wok em i mekim long redim ol tripela sistes.

Long dispela taim tu ol i tingim 13pela krismas bilong promis bilong Sr. Rosemary we ibin kamap long yia 1994.