Introdaksen bilong ol Fi long Raihu Haus Sik bai kamap long 1st Februari 2007.

Menesmen bilong Daiosis bilong Aitape Helt Sevis na Menesmen bilong Raihu Haus Sik i givim toksave igo long olgeta manmeri long Aitape-Lumi na Nuku Distrik olsem bai igat Fi long baim sevis long Raihu Haus Sik. Dispela fi bai kamap long niupela yia 2007.

Daunbilo bai yu ritim astingting bilong putim Fi na mak bilong Fi Helt Bod i makim.

1. Raihu Haus Sik i sot long moni long givim gutpela sevis long yupela. Mipela i nidim sapot bilong ol dona na narapela autsait lain husat i laik givim moni long mipela. Dispela ino orait tumas, long wanem mipela ino inap save hamas moni bai mipela kisim long wanpela yia long lukautim helt bilong yumi.
   
2. Wanpela bikpela samting Menesmen i laik senisim em i kaikai bilong ol sikman husat i stap long Raihu Haus Sik. Mipela i laik olsem haus Sik iken givim gutpela na planti kaikai inap long strongim bodi bilong ol sikman long kamap orait gen.
   
3. Narapela bikpela samting em i wari long sait bilong marasin. Sampela taim Gavman i sot long marasin na mipela i nidim dispela marasin long lukautim ol sik bilong yumi. Olsem na mipela nidim moni long baim marasin long seivim laip long dispela kain taim we marasin i sot.
   
4. Namba Fo wari istap long lukautim ol sikman bilong bus. Mipela makim hap moni long lukautim trenspot - kar, bot na balus bilong ol sikman husat istap longwe na nidim helpim long kamap long Haus Sik.
   
5. Narapela wari gen istap long sait bilong mentenens - em ino isi long painim moni long lukautim gut ol haus bilong Raihu. Sapos mipela ino lukautim gut ol haus bilong Raihu na bilong ol wokman bilong mipela, sevis bilong mipela bai bagarap.
   
6. Sampela manmeri ol i les long bihainim ol taim bilong Autpeisen na ol ikam long laik bilong ol yet. Dispela ino orait, long wanem Autpeisen i pas pinis, ol sikman igo stret long wot long lukim Nes. Planti taim dispela i givim hatwok long Nes na hevi long ol arapela sikman husat i slip long wot. Olsem na bai igat ekstra Fi long ol lain husat ikam long nait.
   
7. Wankain bai igat Fi long ol husat i spak na pait o husat pait nating na kisim bagarap.
   
8. Menesmen igat strongpela bilip olsem introdaksen bilong Fi bai strongim tingting olsem Raihu Haus Sik em i Haus Sik bilong yumi. Menesmen i lukautim sevis tasol, ino praivet bisnis bilong Daiosis. Nogat. Taim yupela i baim Fi, tingim gut long dispela. Bai yupela i gat rait long askim menesmen long givim gutpela sevis na bai yumi olgeta lukautim Haus Sik gut.
   
9. Menesmen i bilip tu olsem introdaksen bilong Fi bai strongim tingting bilong lukautim yu yet long ples; kainkain sik igat as bilong em long ples - sik pekpek wara, sik taifoit, sampela sik bilong skin. Sapos yu lukautim ples gut, iken daunim namba bilong ol natnat long ples tu, na ol snek ino kamap klostu long haus bilong yu. Olgeta dispela samting em i stap aninit long progrem bilong 'Helti Ailan'.
   
10. Menesmen i laik strongim yupela tu long kam long Haus Sik hariap; noken ting olsem yu nogat moni o moni bai sot, olsem na yu skelim pastaim long ples. Nogat! Sapos yu kam wantaim liklik sik, bai marasin bilong Autpeisen igat gutpela sans long oraitim sik bilong yu. Sapos yu weit longpela taim inap long taim sik i bikpela tumas, bai igat bikpela sans marasin ino inap winim sik bilong yu o yu mas slip long Haus Sik long kisim strongpela marasin. Dispela bai rausim bikpela moni moa long yu.
    
11. Em i impoten long yupela save olsem moni bilong Fi ino inap baim pei bilong ol wokman bilong Haus Sik. Gavman i baim dispela.
    
12. Yumi olgeta save pinis olsem ol arapela Haus Sik igat Fi, na Fi long ol arapela Haus Sik i antap stret. Sapos yupela skelim gut ol Fi Menesmen i makim na raitim daunbilo, bai yupela agri olsem Fi bilong Raihu Haus Sik ino antap tumas.
    
13. Sapos yupela igat wari o askim long dispela, i gutpela long save olsem Raihu Haus Sik na ol arapela Helt Sevis bilong Daiosis bilong Aitape igat Menesmen Bod bilong em. Igat ol lain bilong Daiosis, bilong gavman na bilong komuniti istap long dispela Bod long lukautim sevis bilong yumi. Yu ken rait long Bod na Bod bai bekim, o yu ken kam long bikpela bung bilong Bod we olgeta manmeri iken harim ripot na plesn bilong Haus Sik. Bod bai toksave lng dispela kain bung.

OL FI:

back to the first page -