Ol pipol bilong Pes Katolik Misin bai kamapim wanpela Wara Projek wantaim helpim bilong PNG Sasteinabol Divelopmen Progrem Limited.

Long Trinde (23rd Jenuari 2008) dispela wik, bai igat saining bilong wanpela MOA (Memorandum of Agreement) namel long ol Projek Ona (Pes PAMU Komuniti - tupela mausman bilong ol papa graun) na Projek Menesa (Daiosis bilong Aitape). Distrik Edministreita Timothy Teklan wantaim Progrem Menesa, Lawrence Stevens bilong CSIP - PNG Sasteinabol Divelopmen Progrem Ltd bai sainim dispela pepa tu.

Dispela saining bilong MOA em long kisim helpim bilong PNG Sasteinabol Divelopmen Progrem long givim moni long statim dispela wara projek.

Dispela projek bai givim helpim long tripela komuniti na fopela hap we ol manmeri bilong eria bilong Pes isave kisim sevis long en, olsem Pes Katolik Misin Steisin, St. Joseph Praimeri Skul na Helt Senta na Vokeisinol Senta. Ol tripela komuniti em Pes, Aisirap na Marok.

Dispela projek em wanpela komuniti beis projek we igat gutpela bilong em long helpim ol pipol long nau na tu taim bihain.

Tony Elmale, Pis na Jastis Opisa bilong Daiosis na tu wanpela papa graun bilong Pes, ibin tok olsem dispela projek ikamap tu bihainim tingting bilong ol manmeri long dispela ples long painim sampela wei we ol iken stretim sindaun bilong ol pipol.

Mr. Elmale itok moa olsem dispela projek ino kamap nating, ibin gat wanpela wok painim-aut we ol opisa bilong Water Board (Madang) ibin kam na mekim long oraitim dispela tingting olsem wara projek iken kamap long dispela eria.

"PNG Sasteinabol Divelopmen Progrem i amamas long ol pipol bilong Pes long wanem ol yet i mekim lokol kontribusen bilong ol long dispela projek na dispela em i soim olsem ol pipol igat bikpela laik tru olsem dispela projek imas kamap," Mr. Elmale itok.

Dispela lokol kontribusen em long helpim projek igo na stap longpela taim long sevim ol pipol.

Mr. Elmale itok tu olsem Daiosis bilong Aitape bai go pas long kodineitim dispela wok bilong projek, inap long taim we ol pipol iken painim helpim ikam tu long gavman.

Em itok astingting bilong dispela projek em long helpim ol manmeri long taim bilong nogat wara (drai sisen), long sait bilong lukautim ol toilet, waswas na planti ol narapela samting.

Dispela projek em bai stat long neks mun (Februari).