By CEC

"Skulim ol pikinini long tok bilong God na gutpela sindaun i nambawan wok na raits bilong ol papa, mama."

Ol i save tok, papamama i nambawan tisa bilong ol pikinini bilong ol. Na i tru tumas, stat long taim pikinini i kamap olsem bebi, ol papamama i save lainim em long toktok, wokabaut, kaikai na long save long ol kastom pasin bilong ples na long mekim ol kainkiain wok.

Sapos ol ino mekim dispela, em pikinini bai ino inap kamap gut na sindaun bilong em bai bagarap. Taim em i kamap bikpela, em bai lainim planti ol samting moa gen long skul na long ol pren bilong em. Nau em i kamapim gutpela sindaun bilong em long bihainim.

Olsem tasol papamama igat wok na raits long skulim ol pikinini long tok bilong God na pasin bilip bilong ol taim ol i liklik yet. Taim ol i kamap bikpela, ol skuls na sios bai inapim na strongim dispela save blong ol long tok bilong God, pasin bilong pre na lotu na holim pas bilip bilong ol.

As tingting bilong ol Katolik skul em long givim tok helpim spirit bilong ol long gro.

Bihain ol i helpim ol long ol arapela save bilong bodi na tok bilong God na gutpela pasin em imas stap ples klia long skul.

Ol Bod of Menismen, na ol P&C long skul i gat rait na wok long lukim olsem ol tisa imas givim tok bilong God long ol pikinini na spirit laip bilong skul imas stap ples klia.

Sapos dispela ino stap ol yet imas toktok planti na serim taim long helpim ol tisa long mekim pat bilong ol. Strongim ol long go lotu na misa, mekim pre na ridim baibel na mekim planti wok marimari na kamapim pasin bel isi na gutpela sindaun long skul na tu long plei.

Sapos mipela olgeta i mekim hap bilong mipela wanwan na helpim wanpela na narapela yumi bai helpim olgeta lain long painim gutpela sindaun na laip bilong yumi bai i amamas oltaim na mipela i kamapim kingdom bilong God hia long graun.

Em tasol na stap holi na mekim wok bilong yu.