By Sr. Regina Sabau PBVM

Bikpela pestodei bilong Korpus Kristi ibin bungim olgeta pipol wantaim.

Long St.Ignatius katidral Peris long Aitape Dineri, ibin gat bikpela prosesio we ibin stat long Yut Spots Senta igo antap long St.Ignatius katidral.

Ol wanwan komyuniti stat long Kem bilong Adam Amod, Fatima Hil, Kem bilong Pius Mendi na Rere Kem ibin gat ol liklik alta bilong adoreisen we ol lian ibin bilasim.

Planti ol manmeri ibin wokabaut long dispela prosesio, na tu san ino bin hot tumas olsem na em ibin mekim ples i kol long ol i wokabaut.

Fr. David Atuanya CSSp, ibin go pas long mekim dispela Misa bilong Korpus Kristi wantaim helpim bilong Fr. Chinedu Nwadike CCSp, husait i Peris Pris bilong dispela peris, na tu Fr. Santus.

Dispela pestodei ibin kamap gutpela tru.

Long ali Aila tu ibin gat bikpela prosesio we isave kamp long olgeta yia.

Ol wanwan ples stat long Puyat igo inap long malung isave bilasim ol wanwan altar wantaim ol naispela bilas olsem ol bogen, flawa, ol laplap wantaim piksa bilong Yesus.

Procesio isave stat long haus lotu igo raunim olgeta ples long ailan bihain ikam bek long haus lotu long pinis.

Planti ol manmeri tu ibin stap long dispela bikpela misa, we Fr. Augustine Kulmana ibin go pas long mekim. Ol pipol ibin kam long Seleo Ailan tu, husait istap insait long dispela wanpela peris bilong Santu Antoni.

Ibin gat liklik ren long moning tasol dispela ino bin barapim misa, olgeta samting igo orait tasol.