Aitape Vokeisenol Skul i stat long lukim ol gutpela senis i wok long kamap.

Bihain long planti yia ikam, dispela skul ino bin lukim sampela gutpela senis i kamap. Tasol nau long yia 2004, wantaim niupela hetmasta bilong ol Richard Kasew, Aitape Vokeisenol Skul i wok long kamap gutpela gen.

Planti ol niupela, liklik divelopmen i wok long kamap long traim na painim sampela wei bilong kisim ol liklik moni long helpim skul.

Mr. Kasew yet ibin kamapim tu wanpela projek bilong helpim ol sumatin bilong em, husat ol i painim hat long sait bilong skul pi. Dispela projek ol i kolim long ‘Pilot Rice Project’. Long dispela projek, ol wanwan sumatin i wokim ol wanwan gaden na planim rais bilong salim.

"Mipela igat planti ol gutpela tingting long ol wanem wei bai mipela inap long painim sampela liklik moni bilong helpim skul. Wanpela em long stretim na kamapim gut gen Ongu Treiding Stoa bilong Vokeisenol Skul, long wokim kamap olsem ples bilong Take Away Kaikai, Food Bar na Restraunt wantaim," Mr. Kasew ibin stori.

Em i tok olsem dispela bai helpim skul na tu bai i givim gutpela sevis long ol manmeri bilong Aitape taun.