Long Fonde 10 Jun, ol 20pela man na meri ibin greduiet wantaim luksave olsem ol nau i kamap olsem ol Elementeri Skul Tisa.

Ol dispela lain 5pela bilong Lumi na 15pela bilong Aitape i gredueit bihain long ol i pinisim dispela 3pela yia treining bilong ol long mekim wok olsem ol Elementeri Skul Tisa.

Long dispela gredueisen bilong ol we ibin kamap long Fr. Anthonine Senta long Raihu, Rodney Soiyen, Provinsel Elementeri Skul Kodineita ibin tokaut tu olsem dispela treining we ol dispela ol 20pela man na meri ibin kisim, em i las treining tu we ol lain bilong AusAid i givim moni long helpim, wokim kamap.

Em i tok tu olsem: "Bihain long dispela yia 2004, ol wanem treining we bai i kamap em bai gavman bilong yumi yet bai i lukluk long givim moni long helpim wokim ol."

"Value the human relations and value your community. With the same spirit in your heart, in whatever you do, it will be possible," Robert Miroi, Distrik Edukeisen Advaisa ibin givim dispela strongpela toktok tu long gredueiting tisa, long strongim ol long ol wanem wokabaut bilong ol.