Memba bilong Vanimo Grin Elektoret i givim helpim long ol sumatin long Aitape Vokeisenol Skul.

6pela sumatin huast i stap skul long Aitape Vokeisenol ibin amamas tru taim ol ibin save olsem memba bilong ol, Honorabol Philip Inou, ibin givim wanpela sek wantaim mak moni olsem K4,800 long helpim ol long sait bilong skul pi.

Dispela sek em hetmasta bilong skul yet, Richard Kasew ibin go long Vanimo na kisim long opis bilong memba bihain long em ibin kisim toksave.

"Mi amamas tru long wanem samting Mr. Inou i wokim long ol sumatin bilong mi. Dispela tu i soim olsem dispela memba igat gutpela tingting long lukave long ol lain pipol bilong em," Mr. Kasew ibin tok.

Mr. Kasew tu ibin wokim wanpela askim tu igo long memba bilong Aitape/Lumi Elektoret, Honorabol Patrick Puraitch olsem em tu imas lukluk na traim helpim long wankain wei, long wanem planti long ol sumatin bilong Aitape Vokeisenol, em ol bilong dispela hap eria bilong elektoret bilong em.

"I gutpela olsem Mr. Puraitch inap long givim K30,000 igo long sait bilong helpim kamapim ol gutpela ol pilai olsem soka insait long Aitape. Tasol bai gutpela moa yet, sapos dispela wankain moni iken go long helpim ol pipol long ol narapela wei olsem long sait bilong edukeisen, bai dispela moni iken karim bikpela kaikai moa long planti yia ikam," Mr. Kasew itok.

Dispela K4, 800 sek we Mr. Inou ibin givim em bai go long helpim ol dispela 6pela sumatin long baim skul pi bilong ol we ol papa, mama ino baim pinis yet. Olgeta dispela 6pela sumatin bai kisim K800 long wanwan bilong baim skul pi.