Ol manmeri bilong Aitape i amamas tru long niupela dipatmen stoa bilong Papindo.

Long Mande Jun 28, Papindo Treiding long Aitape i opim niupela, bikpela dipatmen stoa bilong ol.

Planti ol manmeri ibin kam long moning taim yet long ol ples long witnesim dispela opening na long baim tu sampela ol gutpela samting long stoa.

Planti ibin tok olsem ol i amamas tru long wanem nau Papindo igat niupela stoa we igat moa speis insait, planti moa samting na ol prais tu i tamblo.

Sampela ibin tok tu olsem dispela em i gutpela olsem wanpela narapela bikpela kampani ikam opim stoa bilong ol long Aitape, bai dispela i bringim tu wok resis namel long ol bisnis lain na bai ol tu i ken daunim prais bilong ol.

Papindo Treiding tu i wok long go pas tu long wokim ol kainkain ol liklik divelopmen insait long Aitape taun eria olsem haus bas-stop bilong ol manmeri long wetim bas na tu meitenens wok long taun maket.