By Katekis John Ebli

Pipol bilong Lumi Peris ibin selebreitim gut tru dispela Pestodei bilong Asensio.

Ibin gat ol medel na setifiket presenteisen long olgeta olpela peris kaunsol. Namba bilong ol inap olsem 37pela olgeta, na ol ibin kam aut long olgeta ples insait long Lumi Peris.

Long taim bilong Misa, Pater Leonard, Vice Siaman bilong PST na Katekis John ibin givim ol medel na setifiket.

5pela long ol dispela lain husat ibin winim 25pela yia na moa, ol i kisim Jubili medel, na ol arapela 32pela husat i aninit long 25 yia ol i kisim setifiket tasol. Ibin gat tupela awot tu em peris i givim igo long ol manmeri ibin mekim ol gutpela wok insait long peris. Ibin gat tu spesel awot bilong ol bus katekis bilong bipo taim ol pes misineri ibin kam insait long Lumi.

Bihain long misa na presenteisen, olgeta ibin bung na kaikai.

Peris ibin amamas long gutpela wok bilong ol dispela lain husat ibin kisim awot na ibin baim wanpela pik na ol narapela kaikai tu. Ol komyuniti yet ibin kukim dispela kaikai bilong ol yet na kisim ikam long pestodei na olgeta samting i ron gut tasol.