By Katekis John Ebli

Bikpela pestodei bilong Pentekos ibin kamap gut tru long Lumi Peris.

Olgeta manmeri i pilim stret pawa na spirit bilong Holi Spirit i wok long dispela taim.

Bipo long Pentekos Sande, ol pipol ibin redim ol yet gut tru long Novena Pre.

Ol Karismatik Grup tu ibin redim ol yet tu. Ol sampela lida ibin go kemp-aut tu long steisen, stat long Mande igo long Sarere. Ibin gat tu Karismatik Misa long Sarere.

Long Sande em Misa stret bilong Pentekos we ol Karismatik na Lijen grup ibin go pas long en. Ibin gat tu ol naispela ol prosesio we ol Katolik meri i mekim. Ol narapela sios tu ibin stap bung wantaim mipela long dispela pestodei long stesin yet.

Long taim bilong Lotu, ol manmeri ibin pilim stret dispela strong na pawa bilong Holi Spirit ibin wok long ol na planti ibin senisim ol pasin bilong ol.

Peris Pris, Fr. Leonard Tarai ofm, ibin go pas long mekim Misa na em tu ibin lukim na em i amamas tru.

Bihain long Misa, ol Karismatik na Katolik meri ibin redim kaikai bilong mipela olgeta long pinisim amamas bilong dispela bikpela pestodei.