Ol manmeri bilong St. Joachim Peris, Aitape Dineri, igivim sapot long Peris Pris bilong ol long kamapim mak moni bilong mekim niupela Haus Lotu.

Long dei 28 long dispela mun, ibin gat lonsing bilong Haus Lotu Fanreising bilong St. Joachim.

Wanpela komiti ol ifomim, aninit long Siamansip bilong Malcom Samala (Distrik Kot Megistret), ibin kamapim sampela tingting long ol wei ol manmeri long peris iken kamapim dispela mak moni bilong haus lotu.

Dispela tingting bilong mekim niupela haus lotu bilong peris em Peris Pris yet Fr. Stan Nwanunobi CSSp, ibin kamapim.

Estimet mak moni bilong kamapim long mekim dispela niupela haus lotu em sanap olsem K500,000.

Fanreising komiti iaskim wanwan manmeri insait long peris long givim moni olsem kontribusen inap long K100 bilong ol lain husat ino wok, K300 bilong ol wokmanmeri, na K500 bilong ol bisnismanmeri.

Komiti siaman imekim tok tu olsem, maski em bai kisim longpela taim long kisim stret dispela mak moni bilong K500, 000, tasol ol ibilip olsem wantaim helpim bilong Bikpela, em iken stiaim ol manmeri long pawa bilong Holi Spirit long givim moni long inapim dispela K500, 000.

Ibin gat ol narapela fanreising ektiviti tu we bai kamap, na Aitape Star ihelpim long mekim apil olsem sapos yu husat yu pilim yu laik helpim long sampela kain wei, yu ken lukim Fr. Stan, ring long em long Ph:8572021, o ol lain bilong St. Joachim Fanreising Komiti.