Ol Marianita Sistes ibilong kantri Ekuado long Saut Amerika.

Wanpela meri nem bilong em Mercedes ibin kirpaim dispela lain sista long 14 Epril 1873.

Astingting bilong Mercedes em long helpim ol meri inogat papa mama, na ol meri igat kainkain hevi long laip bilong ol.

Long Disemba 22, 1996, ol Marianita Sistes ibin kamap long Wassisi na Nuku long askim bilong Bisop Brian Barnes, taim Bisop Tony Burgess ibin stap yet olsem Peris Pris long Wassisi.

Bihain long 12pela yia, ol Sistes ibin growim tupela ros plawa long kongregeisen bilong ol. Em long tupela lokol sista long Nuku Dineri.

Tupela yangpela meri, Sr. Aileen bilong Walgo long Wassisi Peris na Sr. Maryanne bilong Yiliwombuk long Nuku Peris ibin mekim nambawan promis bilong ol long stap sistes long lain bilong ol Marianita Sistes.

Selebreisen ibin kamap long Wassisi long June 5, 2008. Planti ol Katolik manmeri long tupela peris wantaim ol famili na wanpisin, ol relijis na ol leiti na pikinini ibin kamap na stap insait long dispela selebreisen. Namba ibin sanap olsem 1, 000 manmeri.

Het-meri bilong ol Marianita Sistes ibin stap tu long dispela taim. Na Bisop Austen Crapp ofm, ibin go pas long selebreitim dispela misa bilong nambawan promis wantaim helpim bilong 7pela pater.

Ol komuniti bilong tupela sista tu ibin soim kala bilong ol tu long kastam ikam insait long liteji long ol prosesio na arapela hap bilong liteji. Olgeta manmeri ibin amamas tru long wanem tupela sista imekim histori bilong sios long PNG na Aitape long kamap nambawan Marianitia Sistes bilong Papua Niu Gini.

Mipela ilaik mekim tok amamas long tupela sista Maryanne na Aileen long mekim dispela disisen bilong bihainim dispela kain laip bilong ol misinari na mipela iwisim yu tupela gutpela taim long laip bilong yu tupela na sanap strong long karim nem bilong God na ol pipol bilong Aitape Daiosis na sios bilong PNG.