Feature Special
Dispela em i laip stori bilong mama bilong mi, Katarina Tumana, husat ibin dai long dei 29 long mun Oktoba, long las yia 2003.
Bipo mama i bin marit, nem bilong em ibin Katarina Wouki. Mama bilong em ibin karim em long yia 1927, long ples Miwaute.
Long taim em ibin kisim sakramen bilong Konpermasio, ol i givim em narapela nem tu, Regina.
Taim em ibin marit long papa, (Tomas Tumana) em i senisim nem bilong em igo kamap Katarina Tumana. Mama ibin karim mipela 7pela pikinini olgeta. 5pela man na tupela meri. Papa wantaim tu wanpela brata bilong mi tu ol i dai pinis. Nem bilong em David. Na mi wantaim narapela susa bilong mi, Elizabeth, mi tupela i kamap olsem ol sista. Mi yet mi kamap olsem wanpela Franciscan Sista na susa bilong mi Elizabeth i kamap olsem wanpela A.D. (Ancilla Domini - Wok Meri bilong God) Sista.
Taim mipela ibin liklik yet, mipela ibin stap wantaim mama na papa long Fatima. Bihain ol pater i kam daun long Aitape, na mipela tu ibin kam na stap long St. Anna we mama na papa i wok long ol Franciscan pater na bruder.
Mama ibin wok planti yia long ol Franciscan pater na bruder. Em i save mekim ol kain wok olsem wasim klos bilong ol na kuk tu.
Mi lukim mama olsem em ibin wanpela trupela meri long laip bilong em, na wok bilong em i makim olsem em ibin givim em yet long wok bilong em. Na tu long lukautim famili bilong em.
Em ibin wanpela meri bilong pre tu, olsem na laip bilong em i gutpela tru na dispela i helpim tu long winim inap olsem 76 yia olgeta.
Mipela olgeta ibin sori tru long lusim mama, tasol mipela isave olsem em istap long niupela ples nau bilong amamas oltaim long heven.