Ol sumatin bilong Raihu Nesing Skul i amamasim 17 gredueisen seremoni bilong ol long 24 dei bilong mun Mas.

Dispela gredueisen misa we Bishop Austen Crapp OFM ibin go pas long en, i bin kamap long St. Francis Haus Lotu long Raihu Haus Sik yet.

"Dispela setifiket em bilong givim sevis long ol manmeri. Ino bilong usim long kisim biknem long en. Planti taim mi save olsem bai inogat olgeta samting bilong helpim ol sikmanmeri long ol wanem hap yupela bai igo long wok. Tasol mi laikim olsem bai bel bilong yupela imas kirap long givim dispela gutpela sevis long ol pipol. Na tu, mi pre olsem bai God i givim laip long yupela bai yupela inap long givim tu dispela wankain gutpela laip long ol pipol na long ol lain husat yupela igo long sevim," Bishop ibin givim dispela toktok long ol sumatin husat ibin stap long gredueit.

Dr. Edward Knol, wanpela long ol tripela dokta istap nau long Raihu ibin tok tu olsem: "Taim inogat wei moa long helpim, usim het bilong yu long traim painim sampela ol arapela wei long helpim. Be creative. There's always a way to find some solutions. And don't forget that when there is happiness in your work, the patients will also have a positive mind that they will become better."

Ol narapela ol hetman bilong skul tu ibin mekim toktok long strongim ol dispela ol lain husat ol i kisim ol setifiket bilong ol.

Bihain long ol hetman bilong skul tu ibin mekim toktok long strongim ol dispela ol lain husat ol i kisim ol setifiket bilong ol, Bishop i givim las blesing na olgeta i kamaut long Haus Lotu na go long ples bilong gredueisen kaikai wantaim ol mama na papa bilong ol.