Ol mama bilong ples i amamasim dispela bikpela dei bilong ol meri.

Ol mama long ples Warapu ibin mekim bikpela amamas tru long Mas 14, 2005, long selebreitim dispela Nesinol Dei bilong ol Meri.

Ol ibin pilai ol kainkain ol pilai olsem muli resis, relei, voli bol, mekim ol drama na planti ol narapela samting.

Olgeta ol papa tu ibin helpim long bungim han wantaim long mekim dispela dei bilong ol meri ikamap gutpela moa. Sampela ibin helpim wantaim ol pilai samting, na ol narapela ibin givim han long helpim na lukautim ol pikinini bai ol mama iken amamas gut. Planti tu ibin kukim ol gutpela kaikai bilong ol meri bilong ol long apinun bilong pinisim gut dispela dei bilong amamas.

Long Aitape taun yet, ino bin gat wanpela kain bikpela samting ikamap. Ino bin gat mas na ol kainkain ektiviti olsem long ol yia bipo.

Bosmeri bilong ol meri long Aitape Daiosis, Lucy Keino ibin tok olsem ino bin gat gutpela toksave ibin go aut long dispela kain bikpela dei.

"Mi yet, mi bin redim sampela samting long mekim wantaim ol meri long Lumi, tasol ino bin gat moni olsem na mi ino bin inap long go,” Ms. Keino ibin tok.

Em i tok tu olsem em ibin sori tru olsem nogat wanpela gutpela samting ibin kamap long makim dispela bikpela dei, long wanem dispela dei em i bikpela samting tru log olgeta meri insait long kantri na tu long ol narapela hap bilong wol.