Ol man o meri husat isave lukautim ol kakaruk na pato bilong salim i tingting planti long ol bisnis bilong ol bihain long ol i harim dispela toksave bilong 'Bird Flu'.

Dispela awenes bilong dispela sik bilong 'Bird Flu' o sik we isave kilim ol pisin nating, ibin kamap long pes wik bilong mun Mas dispela yia.

Dispela ol toksave em ol sampela wokman bilong Raihu Hausik wantaim helpim bilong meri bilong Dokta Edward Knol, Gonnie ibin go raun long ol hap bilong Aitape Taun na putim ol toksave long notis bod.

As tingting bilong dispela ol toksave em long pulim tingting bilong ol manmeri long ol imas lukautim ol yet wantaim ol famili bilong ol gut. Dispela ol toksave ol i raitim long tok Inglis na Tok Pisin wantaim.

Dr. Edward husat isave wok long Raihu Hausik ibin tok olsem dispela ol toksave em i nambawan hap bilong dispela awenes we ol wokman bilong Family Health Services Division i mekim long putim tingting bilong ol manmeri long dispela sik nogut bilong ol pisin we iken kilim man tu wantaim.

Em itok tu olsem nambatu hap bilong awenes ibin kamap pinis tu, na dispela ibin kamap yet insait long eria bilong haus sik.

"It is important that the people are aware in advance and are prepared for what is to come," Dr. Edward ibin stori long tok Inglis.

Em ibin tokim Aitape Star tu olsem inogat wanpela ripot yet ikamap long haus sik long dispela sik, tasol em itok olsem iken kamap long sampela taim nau o long bihain long wanem Sandaun Provins istap klostu long Indonesia we ol i painim pinis dispela sik bilong 'Bird Flu'.

Dr. Edward itok tu ol (Family Health Services, Raihu) i wok long wetim yet tok orait ikam long Provinsel Helt Opis long Vanimo tu long ol iken go het na wokim sampela moa awenes long dispela wik nogut. Dispela bai kamap long ol skuls, pablik awenes long ol ples bilong maket, taun na ol helt senta.