Ol wokmanmeri bilong Aitape Daiosis i mekim nambawan bung selebreisen long makim dispela Intenesinol Dei bilong ol Meri.

Long dispela dei 8th Mas 2006, ol meri grup na asosiesen long olgeta hap bilong wol ibin selebreitim dei bilong ol.

Dispela dei we United Nation (UN) ibin makim em i bikpela dei bilong ol meri long lukluk bek long ol kainkain hevi bilong 'gender equality', jastis, pis na divelopmen, we ol ibin bungim long planti yia. Dispela dei tu em i narapela gen long dispela Nesinol Dei bilong ol meri. Planti ibin paul na ting olsem em i wanpela dei tasol. Nesinol Dei bilong ol meri bai kamap long 23rd Mas 2006.

Sampela ol wokmeri tasol long daiosis olsem Akauns Opis, Edukeisen, Famili Liap, Pis na Jastis na Edministreisen ibin kam bung long dispela taim. Ino bin gat inap taim na moni long holim wanpela traipela selebreisen bilong olgeta meri insait long daiosis olsem na ol liklik grup tasol i mekim dispela bung.

Bisop Austen Crapp, ofm wantaim Daiosisen Meneja, Maran Nateleo na Vika bilong Fainens, Fr. Timothy Elliott tu ibin stap long dispela bung.

Long selebreitim dispela bung, ibin gat liklik toktok we Daiosis Kodineita bilong Caritas, Lucy Keino ibin serim wantaim ol narapela meri husat ibin stap.

Bisop wantaim Fr. Tim tu ibin tok olsem ol ibin amamas long stap long dispela bung na tu long wanem em i nambawan taim tru long dispela kain bung long kamap.