Planti ol papa insait long St. Ignatius Katiderol Peris ibin bung long Sande 19th long mun Mas long amamasim dispela Fis Dei bilong Santu Josep.

As tingting bilong dispela dei em bilong save na tingim wanem kain wok bilong ol papa insait long famili na ol kainkain wei we ol papa inap long kamapim gutpela sindaun bilong ol famili bilong ol.

Fr. Chinedu Nwadike CSSp, Peris Pris bilong dispela peris ibin go pas long ogenaisim dispela dei. Em tu ibin go pas long mekim Misa na Fr. Martin Ween ibin helpim em.

Insait long skul bilong Misa, Fr. Chinedu ibin tokaut strong olsem olgeta ol meri husat istap insait long dispela asosiesen bilong ol Katolik Mama imas strongim ol man bilong ol o ol papa bai ol tu istap insait long dispela niupela asosiesen bilong ol papa ol i kolim long Katolik Papa Asosiesen.

Fr. Chinedu itok tu olsem dispela em i wanpela wei bilong bungim ol papa bilong ol wanwan komuniti wantaim. Na dispela tu iken helpim long strongim dispela katolik bilip bilong ol, olsem ol kristen bilip bilong ol, olsem ol kristen insait long laip bilong ol.

Dispela fis dei ibin gat Misa long Yut Spots Senta we ol wanwan ol manmeri bilong ol wanwan sab-peris (St. Anna, St. Francis, St. Teresia na St. Joachim) ibin kam bung.

Bihain long Misa, olgeta manmeri ibin go bek long ol wanwan haus bilong ol na amamasim dei wantaim ol papa bilong ol.