Ol papa grup long St. Ignatius Katedral Peris i amamasim Fis Dei bilong Santu Josep, man bilong Maria, mama bilong Jisas.

Long namba 18 dei bilong mun Mas, ol Katolik manmeri bilong dispela peris ibin bung long Yut Spots Senta long wanpela bikpela Misa bilong tingim dei bilong Santu Josep na tu ol papa.

Fr. Stan Nwanunobi CSSp, husat em i pater bilong dispela peris ibin go pas long mekim Misa wantaim helpim bilong ol narapela pater. Long dispela taim tu Bisop Austen crapp ofm, ino bin stap tasol nambatu bilong em Vika Generol, Fr. Greg Bourke ofm, ibin stap.

Dispela dei ibin kamap olsem wanpela spesol dei bilong ol papa grup insait long peris, long wanem planti taim ol mama grup na yut tasol isave amamasim dei bilong ol.

Ol papa ibin bungim han wantaim long kamapim ol naispela prosesio singsing, makim ol 4pela sab-peris insait long Peris.

Long skul bilong Gospel Rit, Fr. Greg ibin toktok long wok bilong ol papa insait long famili, na ol wei we ol pikinini isave kamap bihainim pasin ol papa i soim.

Em itok moa olsem, ol dispela ol wei we ol isave skulim ol pikinini long ol pasin bilong papa yet em i bikpela samting tru long laip bilong famili.

Planti ol lain husat ibin stap itok olsem ol ibin amamas tru.

Bihain long Misa ibin gat liklik kaikai wantaim sampela toktok ikam long ol Asosiesen Rep bilong ol wanwan sab-peris grup. Ol papa yet itok olsem ol ibin kisim bikpela amamas moa long bung wantaim olgeta famili.