Wanpela meri bilong ples Warapu i mekim las promis bilong em long kamap siste.

Sr. Margaret Roni RSM, ibin mekim las promis bilong em long Oda bilong ol Mesi Sistes long namba 8 dei bilong mun Mas.

Dispela bikpela selebreisen ibin kamap long St. Joachim Sab-peris Haus Lotu long Aitape.

Sr. Margaret ibin kamap nambawan meri long ples Warapu long Wes Kos bilong Aitape long kamap Siste, na bihainim dispela laip bilong ol misinari.

Planti ol manmeri ibin stap long witnesim dispela dei. Ol lain famili na ol wantok bilong em ibin wokabaut inap long wanpela dei long kamap long Aitape, long wanem bikpela solwara ibin kirap long dispela taim tu na ol ino bin inap long kam long dingi.

Bisop bilong Aitape yet, Bisop Austen Crapp ofm, ibin go pas long Misa wantaim helpim bilong ol narapela pater bilong Daiosis.

Lida meri o Provinsel bilong Oda bilong ol Mesi Sistes, Sr. Mariska Kua RSM, ibin harim na kisim promis bilong Sr. Margaret.

Ibin gat ol sampela Mesi Sistes na ol Rosari Sistes husat ibin kam long Wewak long witnesim dispela dei tu.