Doneisen bilong Bisop

Olgeta yia, Katolik Sios i save makim ol apil we ol gutpela bilip manmeri i save givim moni igo long hetkota bilong ol long Rome long helpim sios long mekim wok long olgeta hap bilong graun.

Mipela yet long Aitape tu i save kisim sampela bilong dispela moni long helpim wok bilong sios bilong yumi igo het.

Sapos yumi lukluk long misin steitmen bilong yumi long Aitape Daiosis, wanpela hap i tok long kamapim Kingdom bilong God (sios) long Aitape wantaim 'self-reliance'.

Olsem na wanpela tingting bilong mi, em mi laik serim wantaim yupela olgeta katolik manmeri na pikinini em olsem. Bai Aitape Daiosis imas makim wanpela apil bilong Bisop long olgeta yia. Kain olsem Krismas presen bilong Bisop, olgeta Katolik i givim wan Kina (K1.00) long Bisop.

Yumi gat planti tausen Katolik long Daiosis. Na sapos olgeta i givim wan Kina, em bai Bisop i kisim planti moni na em iken yusim dispela moni long wok bilong Daiosis long givim sevis long yumi ol pipol bilong em gen. Na husat i laik givim moa, em istap long laik na pasin bilong em wanwan.

Mi askim yupela long skelim dispela tingting na traim paitim toktok long em long miting long peris na dineri na yumi go het na traim dispela tingting.