Dispeal Karisem Dei we i bin kamap long Fonde namba 10 dei bilong Mei ibin namba wan taim tru bilong ol wanwan fomeisen haus insait long Aitape ikam bung.

Ol Novis bilong ol MFIC sistes, ol Presenteisen sistes na ol Santu Jon bilong God bruder, wantaim tu ol postulen bilong ol Franciscan Fraies, ol Po Kle sistes na ol Petrisien bruder, 6pela fomeisen haus olgeta ikam bung long dispela taim.

Ol ibin statim bung bilong ol wantaim pre pastaim bihain ol igo insait long sesen bilong tok stori. Long dispela sesen, ol wanwan grup bilong ol wanwan fomeisen haus i stori long hau oda o kongrigeisen bilong ol ibin stat pastaim tru, na stori long husat man o meri ibin kamapim dispela wokabaut bilong oda bilong ol.

Bihain long dispela ibin gat liklik taim bilong askim ol questen na wokim sampela ol liklik grup sering. Ibin gat tu wanpela bikpela grup sering ikamap we olgeta ol fomeisen diarekta tu ibin bung wantaim na toktok.

Planti long ol novis na ol postulen ibin tok olsem ol i amamas tru long bung wantaim ol narapela novis na postulen bilong ol narapela ol fomeisen haus.

Sr. Rosemary Milur, MFIC em meri husat ibin kamapim dispela tingting bilong holim wanpela kain dei olsem.

Em itok olsem dispela kain dei em i gutpela tru long wanem em iken helpim moa yet long bungim olgeta ol fomeisen haus wantaim, bai dispela iken kamapim tu gutpela sindaun na wok bung wantaim. Na bai ol relijis bilong ol wanwan ol oda iken save long ol stori bilong ol narapela oda tu.

Sr. Rosemary itok tu olsem olgeta fomeisen dairekta ibin amamas tru taim em ibin tokim ol long dispela tingting bilong em, long gat wanpela kain dei olsem na ol ibin pasim tok tu olsem bai dispela kain bung bai i kamap nau long olgeta yia. Long wanem, em i gutpela wei bilong niupela lain husat ikam bihainim singaut bilong God long save long stori bilong ol arapela oda, istap hia long Aitape.