Dispela wok bilong Non-vaiolens Awenes iwok long kamap bikpela tru long ol skuls, nau insait long Aitape Daiosis.

Wanpela liklik grup iwok long go raun long ol wanwan skul insait long Aitape Dineri, na givim wanpela skul o awenes bilong non-vaiolens ol i kolim long ‘Help Increase Peace Program’ long ol skul pikinini.

Tupela MFIC sistes, Sr. Mairead O’Readon na Sr. Francisca Nama wantaim ol 10pela yut i wok long wok hat tru long traim na rausim o stopim dispela pasin bilong vaiolens o pasin pait insait long ol komyuniti.

Dispela tim bilong ol 10pela yut, ibin kisim treining pastaim tru long Sr. Mairead na Sr. Francisca long wei bilong mekim dispela kain wok. Na nau ol i wok long givim bikpela helpim tru long tupela long mekim dispela ol rau igo long ol skul.

Namba wan wokabaut bilong ol ibin go long Lemieng Komyuniti Skul, we ol igo long ol wanwan greid na bung wantaim ol pikinini.

Ol i soim ol dispela skul pikinini long ol kainkain ol samting olsem, long wei bilong luksave long wanem samting i rong na rait, wei bilong respektim yu yet, pasin bilong tingting pastaim bipo yu wokim wanem samting, pasin bilong lukautim ol narapela na long gat dispela pasin bilong wok bung wantaim long kamapim gutpela sindaun insait long skul, famili na komyuniti tu.

Moni bilong helpim kamapim dispela progrem ikam long CORD AID (Catholic Organisation for Relief and Development). Igat sampela arapela lain tu husat i wok long wokim dispela wankain wok olsem Presenteisen Sista-Sr. Margaret Conway husat istap long Malol Katolik Misin na tupela tisa long Santu Ignatius Sekonderi Skul, Mr. Theo Yakam na Ms. Vero Pekima.

Sr. Mairead itok tu olsem em wantaim grup bilong em bai traim long go long olgeta ol narapela skul insait long Aitape Dineri na bihain sapos ol igat sampela moa ol lain bilong helpim, bai ol igo long tupela narapela dineri, Lumi na Nuku.