Yut Kodineita bilong Aitape Daiosis i lukluk bek long yut ministri long skelim wanem plen o wok redi bilong ol yangpela long namba tri milenium.

Yut kodineita, Gerald Towun i wok long skelim nau sindaun bilong ol yangpela tudei insait long Aitape Daiosis na long Provins tu. Dispela em bilong luksave gut long wanem samting i sot long laip bilong ol yanpela, wanem driman bilong God long Daiosis na long luksave tu long spiritualiti o wok misin bilong ol yu insait long komyuniti.

Mr. Towun i tok olsem ol yut imas stap wanbel na gohet.

Em i tok tu olsem, ol yanpela imas kamap wanbel na imas gat pasin bilong brata susa, long wanem sios i nidim ol yangpela long soim dispela kain pasin bilong bung wantaim bai dispela tu inap long kamapim gut laip bilong ol yet.

Mr. Towun i tok olsem yut opis bilong Daiosis i wok long mekim wanpela treining progrem bilong pomeisen bilong skulim ol yut long peris level insait long ol wanwan dineri bilong daiosis.

Em i tok tu olsem dispela bambai inap long helpim ol yangpela, long luksave long laip bilong ol yet, bai ol wok hamamas, wantaim felosip na sevis i ken kamap gut.

Mr. Towun i tok strong olsem ol yangpela bilong tudei, i olsem ol wasman bilong moning, taim san ikamap igo inap long namba tri milenium.

Em i mekim dispela tok long wanem, long dispela taim ikam, kainkain traim na hevi bai i kamap long ol yangpela na bai ol imas sanap strong na putim Jisas Krais, olsem san bilong givim lait long laip bilong ol.

Mr. Towun i toksave tu olsem bai igat wanpela yut reli we bai i kamap tu long mun Julai. Na astingting bilong dispela reli em ‘Mi laik lukim Jisas’. Dispela yut reli em bai kamap long Lumi, we ol yut bilong Lumi na Nuku wantaim tu ol yut bilong Aitape bai ikam bung.