Long 28 na 29 dei bilong mun Mei, ibin gat wanpela bikpela selebreisen ibin kamap long Lumi Dineri.
Olgeta peris bilong Lumi Dineri ibin kam bung wantaim olsem wanpela famili o bodi bilong Krais long selebreitim Korpus Kristi long Puang Peris.
Ol peris bilong Lumi Dineri husat ol ibin kam long dispela selebreisen em ol pipol bilong Ningil Peris, Fatima Peris, Lumi Peris yet, Karaitem/Yaluwape Peris, Yili Peris na Laingim Peris.
Ol bikpela samting we ibin kamap long dispela selebreisen we Lumi Dineri ibin plenim i bihainim singaut bilong leit Pope Jon Pol II long tingim 2005 olsem yia bilong Holi Yukaris.
Ol peris pris na ol pastoral wokmanmeri ibin redim gut ol perisines we ol ibin go aut long ol wanwan komuniti na givim ritrit o sarap long ol pipol long mining na as tingting bilong Holi Yukaris long laip bilong Sios.
Namel tu long dispela ol wok redi, ol wanwan peris ibin gat ol Benediksen na ol wanwan haus lotu we igat tabenakel, ol pipol isave gat taim bilong Holi Awa na Malolo tasol, wantaim Jisas long Holi Yukaris long tabenakel.
Dispela ol Holi Awa na Benediksen ibin redim gut tru ol pipol long wanwan peris bipo long bikpela selebreisen long Sarere 28 dei na Sande 29 dei bilong Mei long Puang Peris.
Ibin gat bikpela progrem long ol samting we ibin kamap tu long dispela tupela dei.
Long Sarere, Fr. Joachim Garu ibin statim Misa long hap-pas fo (4:30am) long bik moning, long Lumi Peris. Long dispela hap, em i putim Holi Yukaris long Monstrans na ol i mekim bikpela prosesio wantaim Holi Yukaris igo long Puang Peris. Long ol wanwan haus bilong adoreisen na benediksen, ol ibin bilasim gut tru wantaim ol bogen, na ol naispela falwa. Dispela em ol pipol bilong Lumi, Fatima, Yili, Karuka/Mesi na Puang ibin mekim.
Long wankain taim Fr. Hugh Kuam ibin mekim Misa tu long Fatima Peris (Karate) na ibin prosesio wantaim ol pipol ikam long Puang Peris. Long Ningil Peris, Fr. Augustine Aigilo ibin mekim Misa long 9 kilok long moning na bihain em tu wantaim ol pipol i mekim prosesio igo long Puang Peris.
Taim olgeta ol peris ikam kamap long Puang Peris haus lotu, ol i sindaun malolo liklik na kaikai. Long 5 kilok long apinun, ibin gat liklik baibel lotu wantaim Holi Awa na fopela skul o semina we ol fopela pater Fr. Joachim, Fr. Dominic, Fr. Hugh na Fr. Leonard ibin givim.
Bihain long ol skul ibin gat bikpela pre litani bilong Yukaris long pinisim semina baibel lotu, wantaim blesing bilong Jisas long Holi Yukaris. Long hap-pas eit (8:30pm) long nait, ibin gat progrem bilong ol wanwan peris long gat wan awa bilong Holi Awa. Dispela ibin go inap long hap-pas tu long biknait (2:30am). Bihain long 4 kilok long moning (4:00am) ibin gat preis na wosip long haus lotu.
Long Sande 29 dei, ibin gat bikpela Misa bilong makim Fis Dei bilong Korpus Kristi we ibin stat long 9 kilok moning. Olgeta pater wantaim ol yukaris minista, ol ministran, na ol singsing grup ibin mekim prosesio igo long skul plei graun.
Namel long dispela prosesio long stat bilong Misa, mipela ibin prosesio wantaim Holi Yukaris we mipela ibin putim long wanpela bet namel long ples bilong Misa. Dispela i bihainim singaut o as tignting (theme) bilong Misa bilong mipela we itok: "Long Holi Yukaris, Jisas i bungim yumi (wanwan peris long dineri) i kamap wanpela bodi bilong em". Bilas na bogen wantaim steij ibin luk nais tru na dispela ibin kamap long hatwok bilong ol pipol bilong Puang Peris.
Long taim bilong Misa stret, ol wanwan peris ibin go pas long mekim ol prosesio long ol wanwan hap. Pater husat ibin go pas long mekim Misa em Fr. Joachim (Din), na Fr. Augustine i givim skul. Masta bilong seremoni em Fr. Len. Inap olsem 1, 500 man meri na pikinini ibin kamap long dispela selebreisen.
Sampela ol brata sios tu ibin kam na helpim long lukautim ol pipol long sait bilong kaikai na ples bilong slip.
Lukluk igo bek, mi yet mi skelim olsem dispela em wanpela gutpela taim we ol peris i bung olsem wanpela dineri na serim bilip, tingting na luksave long wanpela na narapela, serim peris plen na kisim helpim long narapela; bungim ol arapela peris bilong dineri. Bikpela samting tru em, mipela i pilim olsem "mipela i memba bilong bodi bilong Krais we Holi Yukaris i bungim mipela (wanwan peris) i wanpela dineri tasol."
Lumi Dineri bai pinisim amamas bilong yia bilong Yukaris em long Fis Dei bilong "Krais i King", na dispela bai mipela i selebreitim long wanwan peris yet long dispela yia 2005.