Ol mama bilong St. Ignatius Katidrol Peris long Aitape i amamasim dei bilong ol.

Mun Mei em yumi ol Katolik isave olsem em i mun bilong Mama Maria insait long kalenda bilong sios. Na bungim wantaim dispela mun yumi tingim tu ol mama bilong yumi long Mother's Day.

Em i wanpela spesol taim we yumi save tingim mama bilong Jisas, Quin bilong Heven Virgo Maria na tu ol meri husat igat spesol wok insait long lap bilong yumi wanwan tu, ol mama.

Olsem na long dispela mun 13th Mei, ol mama bilong dispela peris i bung wantaim long selebreitim dei bilong ol wantaim bikpela Misa long Yut Spots Senta long Aitape.

Bisop Austin Crapp ofm, yet ibin go pas long mekim dispela Misa wantaim helpim bilong Peris Pris Fr. Stan Nwanunobi CSSp, na ol arapela pater.

Long skul bilong em Bisop Austin ibin mekim dispela toktok: "Ol mama igat spesol wok long mekim inap long taim ol indai. Olsem na sapos yu laikim gutpela laip, yu mas aninit long mama bilong yu na harim tok na helpim em."

Em itok moa olsem, sampela ol papa ino save soim rispek igo long meri bilong ol na ol isave ting meri em i samting nating. Tasol, dispela noken kamap olsem.

Ol papa imas bung wantaim ol mama long olgeta samting bilong kamapim gutpela kristen famili laip.

Ibin gat ol naispela prosesio we ol wanwan sab-peris olsem St. Francis (Raihu), St. Theresia, St. Anna, St. Joseph (Tumeleo ailan) na St. Joachim ibin mekim.

Bihain long Misa ol mama ibin bung long serim kaikai na lukluk long ol kainkain pilai na drama we ibin kamap. Sampela tu ibin mekim senis presen.