Ol sampela yut long Aitape i soim dispela pasin bilong luksave long ol brata na susa husat i kisim bikpela bagarap long maunten paia bilong Manam Island, Madang Provins.

Wanpela gutpela bisnismeri na sitisen bilong Aitape Taun i go pas long dispela wok. Dispela meri em Maria Bell. Mrs. Bell wantaim sampela ol lain yut i wok long wok bung wantaim na mekim ol wil-baro pus long traim na kisim sampela moni bilong helpim dispela ol lain long Madang.

Taim Aitape Star ibin askim Mrs. Bell long wanem as na em i mekim dispela samting, na em itok: "I gutpela olsem yumi ol lain Aitape tu imas gat wankain luksave long ol brata na susa bilong yumi long Manam, taim ol i kisim bagarap. Long wanem long taim bilong ‘tsunami disasta’, ol tu ibin gat sampela luksave long yumi."

Mrs. Bell i tokim Aitape Star tu olsem em wantaim ol lain yut bilong em i wok long mekim dispela ol wil-baro pus long traim na kisim mak moni inap olsem K1,000.00.

Taim ol ikisim pinis dispela mak moni, bai ol i salim igo long ol lain long Madang bilong makim olsem dispela em i soim luksave bilong ol pipol long Aitape long ol brata na susa husat i kisim bagarap.

Mrs. Bell tu i askim sapot bilong yupela ol gutpela manmeri bilong ol Aitape long ol wil-baro pus we em wantaim ol lain bilong em bai wokim.

Oltaim yu mas igat luksave long helpim na givim taim narapela i kisim bagarap, nogut wanpela taim yu kisim bagarap na nogat wanpela bai gat luksave long yu!