Pater Dominic Yimiten ibin kamap namba tu man bilong mekim promis bilong em olsem wanpela Daiosisen pater long dispela yia. Dispela odineisen bilong em tu i mekim em nambawan pater bilong Palai.

Pater Dominic ibin kam long wanpela gutpela femili. Papa bilong em ibin wanpela bikman long ples na olgeta brata na susa bilong em ikisim ol gutpela save long skul na holim ol kainkain wok olsem ol tisa na tu insait long pablik sevis.

Long dispela taim bilong odineisen, Bishop Austen Crapp OFM, ibin palai long balus igo long Sibilanga na bihain em i wokabaut igo daun long Yanungen.

Ples bilong odineisen ibin stap long hap we olpela rot bilong balus istap long en. Long dispela hap tu ol pipol isanapim steij bilong misa antap long ples we olpela haus lotu ibin save sanap.

Planti long ol manmeri we i bin kam long kar ibin kalap go daun long Monandin maus rot na wokabaut igo long ples bilong odineisen. Planti ol pater tu ino bin kamap long dispela taim. Ol dispela we ibin kamap em pater yet bilong Wassisi peris, Fr. Terrence Tavaive, Fr. Elias Manira, Fr. Zachary Miroi wantaim Fr. Dominic Numbanoko. Sr. Maria Mooney wantaim ol yangpela sistes bilong em, ibin wokabaut long Yimut ikam long Nuku na kalap long wanpela kar ikam long Monandin maus rot. Ol Marianita Sistes tu ibin kamap long dispela taim.

Planti moa man, meri na pikinini ibin kam long Wassisi peris yet, wantaim sampela long Ningil, Nuku na Aitape.

Long taim bilong odineisen misa, Fr. Terrence ibin tok welkam na tenkyu long olgeta manmeri long wokim dispela bikpela wokabaut ikam long witnesim dispela spesiol dei. Ibin gat tu planti ol gutpela singsing na prosesio.

Bihain long dispela bikpela misa bilong odineisen, ibin gat bikpela kaikai.