Ol Sande Skul Pikinini long Aitape Peris i amamas long dei bilong ol, na tu long dei bilong tingim ol Martyr insait long PNG na Solomon Ailan.

Inap olsem 100 na moa ol liklik pikinini wantaim ol papa, mama na ol femili bilong ol ibin bung long selebreitim wanpela misa bilong ol Sande Skul pikinini.

Ol dispela ol pikinini bilong ol fopela sab-peris insait long St. Ignatius Katidrel Peris, (St. Anna, St. Therese, St. Francis na St. Joachim) ibin kam long haus lotu bilong ol St. Clare's sistes long dispela bikpela misa.

Peris Pris, Fr. Chinedu Nwadike CSSp, yet ibin go pas long mekim dispela misa bilong ol pikinini.

Olgeta pikinini ibin amamas tru long dispela taim, na singsing wantaim ol prosesio we ol ibin mekim ibin kamap gutpela tru.

Planti ol lain femili na ol papa, mama tu ibin amamas wantaim ol pikinini bilong ol.

Bihain long misa ibin gat bikpela kaikai bilong olgeta pikinini wantaim ol sampela kain pilai we ibin kamap long Yut Spots Senta.